Näyttely kertou eri šukupolvien nuorista
Kiži-musejon uuši näyttely kertou poikaijäštä ta mimmosena še oli männyöššä ajašša ta nyt, mimmoset huolet ta tehtävät nuorilla ollah yhtehisie ta mimmoset erilaisie.
Otrokit ta zumerit -näyttelyššä on mukava käyvä koko perehellä, še šynnyttäy äijän teemoja vanhempien keškuššeltavakši lapšien kera.
Z-šukupolven nuoret ollah poikaikäset nuoret, kumpaset on šynnytty 2003—2012 vuosina. Hyö ečitäh totuutta, kiinitetäh huomijuo perintehih, tahotah kehittyä luovua ruatuo ta elyä luonnonyštävällisešti.
– Enšiksi, miula oli mukava kaččuo, ket ollah Puškinin kortin pitäjät. Še on erikoini ikäryhmä ta Puškinin kortin pitäjät ollah juštih poikaikäset. Kulttuurilaitokšien pitäy viettyä erikoista työtä, jotta heilä olis mukava tulla musejoh, teatterih tahi näyttelyh. Šentäh mie piätin valmistua näyttely täštä lyhyöštä ta oikein tärkieštä ijäštä, šano näyttelyn kurattori Jekaterina Ričkova.
Näyttely kertou šiitä, mi on šelvä kaikilla poikaikäsillä ta mi huolehtiu heitä. Šiinä on muutoma oša: pereh, opaššuš, ruato ta harraššukšet, muoti ta rakkahuš. Joka teema on esitetty kahešta puolešta: nykyaika ta 1800-luku.
“Otrokit ta zumerit” on interaktiivini näyttely, šielä voipi šoittua šähkökitaralla, panna jalkah muotikkahat kenkät, leikkie šanapelih, kumpasen avulla vanhemmat tiijuššetah, mitä merkitäh Z-šukupolven nuorien uuvvet šanat, a iče Z-šukupolven nuoret päinvaštoin tutuššutah šiih, mitein paistih nuoret XIX-vuosišuan lopušša ta XX-vuosišuan alušša.
Otrokit ta zumerit -näyttely toimiu pakkaiskuun 14. päiväh šuaten.
