Venäjän vuuvven 2020 paraš kašvattaja -kilpailušša laureatiksi tuli 15 henkie. Heijän joukošša on petroskoilaini Natalja Mihailova. Hiän voitti Entokulttuuriperinnön šäilyttämiseštä -nominatijošša.
Kilpailušša Natalja kerto ta näytti, mitein hiän opaštau lapšie tanššimah Karjalan kanšojen piirileikkijä ta laulamah lauluja, mintäh še on hyvä lapšilla ta mitein auttau heijän kehittämistä.
– Kilpailušša kaikkie ihaššutti še, jotta mie näytin Karjalan kanšojen perintehie. Mie olin karjalaisešša puvušša ta šoitin kantelehella. Še kiinitti arvoštelijien huomijuo. Miula oikein miellytti tämä kilpailu, šain äijän uušie tuttavie ta on mukava, jotta kašvattajan ammattih on niin äijän huomijuo. Šemmosien kilpailujen jäkeh noušou ammatin statussi, kerto Natalja Mihailova.
Natalja Mihailova ruatau Petroskoin 71. päiväkojissa musiikkijohtajana. Kilpailun finalie piettih Permissä. Parahan kašvattajan nimeštä kilpaili 74 ihmistä koko Venäjältä, heistä laureatiksi tuli 15 henkie.