Šardža on tunnuššettu Arabiemiirikuntien kultuuripiäkaupunkiksi. Šielä vietetäh äijän festivalija ta kulttuuriprojektija. Niijen luvušša on “Muailman perinnön netäli”: joka kuukauši eryäš mua esittäy omua kulttuurie ta perintehie. Pimiekuušša tapahtumah ošallistu Venäjä.
– Venäjyä etuššettih Kižin musejo šekä joukot ta muasterit Hanti-Mansiiskista. Netälin kuluos’s’a Arabiemiirikuntien vierahat ta eläjät tutuššuttih Venäjän pohjoiskanšojen folklorih, kanšanpukuloih, käsityöammattiloih ta ruokah. Näyttelyn kävijät ihual’tih puurakennuštaijon muistomerkkijä, meijän kirvešmiehien neruo, yritettih iče rakentua kehikkyö. Joka kävijä halusi šuaha tietyä, mitein piäššä ihmellisellä šuarella, kertou Kiži-musejon lehistöpalvelun ruataja Margarita Gaškova.
Projektin järještäjänä on Šardžan perinnön instituutti, kumpani käsittelöy Arabiemiirikuntien ta muijen maijen kulttuuriperinnön tutkimisen, šäilyttämisen ta eistämisen kyšymykšie, järještäy kulttuuritapahtumie ta auttau kokomukšien vaihtuo.