Luve, kižua, yhty kilbah!
Kipinä-žurnualan veres karjalankieline noumero on jo myödävänny Periodika-julguamos.
Mennyöl sygyzyl “Kipinän” toimittajat käydih ruadomatkah Jessoilah, kus vuvves 2006 algajen ruadau Valgien kodine -lapsien mul’tistuudii. Nuoret mul’tfil’moin luadijat saneltih da ozutettih, kui ruado eistyy. Sih nähte nygöi tiijustetah “Kipinän” lugijat.
— Vie erähii tämän noumeran piähengilöi on Sergei Gapanovič. Mies on kuulužu sil, ku luadi Karjalah uvven kohtan turistoih da paikallizih eläjih niškoi — Jänölöin alangon. Sergei mielihyväl saneli, kui rubieu ruadamah ielleh da kenen jänöit jo ollah ijäkse kaiverdetut kallivoh, saneli “Kipinän” toimittai Ol’ga Smotrova.
Vie eräs Karjalan neroniekku on pandu ezile täs noumeras. Se on Kemin eläi Vasilii Seliv’orstov. Häi maltau ylen harvinastu neruo — punuo puun juuris. Vasilien urokal olluh Tatjana Barantseva saneli kai ratkah sih ruadoh nähte: mäččäh käyndäs algajen valmeheh astieh libo muuh veššissäh.
Täl kerdua vuvven allus “Kipinä” on ilmoitannuh uvven kilvan kogo vuvvekse.
— Patakoičemmo meijän karjalan-, vepsän- da suomenkielizii lugijoi kirjuttamah, kui hyö harjaitetah sportua da mit sportulajit miellytetäh heidy enimäl. Kilbah vuotammo kerdomuksii, runoloi, piirrustuksii da fotokuvii. Kilbu jatkuu syvyskuun 30. päivässäh, sanou žurnualan piätoimittai Jana Filimonkova.
