Lukemista kešäiltoina löytyy Taival-almanakašta
Vuuvven 2025 karjalankielini almanakka näkipäivänvalon. Šen šivuilta lukija löytäy prousua ta runoja, šekä artikkelija ta tutkimuškirjutukšie.
“Taipalen” enšimmäisillä šivuilla on karjalaisien runoilijien tevokšie. Tällä kertua ne ollah kaikilla tverinkarjalakši, vienakši, livviksi ta lyydiksi.
— Taival-almanakašta on tullun hyvä kenttä, missä kokenuot kirjuttajat voijah esittyä omie uušie tevokšieh, šekä alottajat — kuot’ella nerojah kirjuttamisešša. Almanakan jokahisen kirjuttajan huolena on karjalan kieli ta karjalaini kulttuuri, niijen tulovaisuš. Tänä vuotena olemma šuanun almanakan kanšiloih kirjutukšie karjalan kielen livvin, vienan, tverin ta lyydin murtehella. Tveriläisie ta lyydiläisie kirjutukšie ei ole äijän, ka niijen kirjuttajien tahto kehittyä omien murtehien kirjakieltä on kiitettävä, korošti almanakan toimittaja Maikki Remšujeva.
Almanakan piäteemana on Šuuren Voiton 80-vuotispäivä. Šota-ajan teemalla on omissettu muisselmie ta perehistorijat šekä kirjutukšet kahešta naisšankarista — vepšäläiseštä Anna Lisitsinašta ta karjalaisešta Marija Melentjevašta.
Ikälanka-rubrikissa on kakši artikkelie livviksi ta vienakši. L’ubov’ Baltazar omisti kirjutukšen omalla perehellä, kuin še eli “kylmänšovan” aikana. Sandra Stepanova kirjuttau šiitä, kuin Šombarven rahvaš muutettih omua elämyä paremmakši ta toimehtulijakši.
Lisäkši lukija šuau lukie Šiimekšen Pekan, Dmitrii Dmitrijevin ta Pekka Ivanovin prousua, kotišeutu- ta runoteemoilla omissettuja tutkimuškirjutukšie šekä artikkelija Vuokkiniemen entisešta eläjäštä Pekka Remšujevista, kumpasen šyntymäštä tänä vuotena mäni šata vuotta ta nykyseštä eläjäštä Vitalii Nikulinista ta hänen harraššukšešta.
