Lapsed ozateleba Karjalan eläjid vepsän kelel
”Pagin kulub, sana lendab”-projektan aigan kaiken kezan openikad, kudambad opendaba vepsän kel’t školiš, ühtniba melentartuižihe mastar’-klassoihe, miččid tegiba niiden täht professionaližed video-operatorad, änenohjandajad, fototegijad, lehtmehed. Lapsed openzihe radmaha kameranke, tehmaha lühüdoid videos’užetoid. Hö iče kirjutiba reportažid, tekstoid vepsän kelel, tegiba sjomkoid. Necen täht kaikuččen školan täht osttihe nuotbuk, foto- i videokamer.
Jäl’ges openduzčasuid lapsed iče valičiba temoid, ristituid – min polhe tahtoiba tehta s’užet, i hüviš meliš radoiba. Kaikuččele školale pidab tehta koume s’užetad. Jo teravas mö voim nähta niid.
Tämbei om jo vaumiž üks’ videos’užet-ozateluz, miččen oma tehnuded lapsed, i se om omištadud 100-voččele Karjalan valdkundan jubilejale.
– Karjalas eläba igähižed rahvahad, kudambil om bohat kul’tur, istorii, ičeze tradicijad. Miše kingitada lapsiden homaičust vepsän kel’he, ozutada vepsän man čomut, mö pätim tehta mugoižen videorolikan. Tahtoim ozutada lapsile, miše hö oma unikaližed, hö oma vepsläižed i eläba čomal Karjalan mal, sanub Vepsän kul’tursebran pämez’ Larisa Čirkova.
Vepsän kul’tursebran ”Pagin kulub, sana lendab”-projekt todenzoittas eloho Rahvahaližen i regionaližen politikan ministerstvan tugele. Sen partn’orad oma ”Värtin”-etnokul’turine keskuz, Kalagen, Šoutjärven, Šokšun i Suomalaiž-ugrilaine školad.
