Läksi eloho jumoristine videožurnal Karjalan rahvahalizil kelil
Karjalaižiden, vepsläižiden da suomalaižiden mediakeskuz vaumiči jumoristižen žurnalan, miččehe mülüba videorolikad Karjalan rahvahalizil kelil. Egläi mediakeskuses oli tehtud videožurnalan prezentacii. Lapsed, kudambad oliba pähengiden roliš, saiba lahjad.
― Mö olem ihastusiš, miše lopuks ozutim meiden radod, mittušt olim tehnuded koume kud. Lapsed da heiden kazvatajad mugažo jo lujas varastiba videožurnalan ozutelust. Ozutelusen jäl’ghe küzuim heiden tundmusiš. Lapsile da vanhembile tuliba mel’he tehtud videorolikad. Lapsed sanuiba, miše tahtoižiba udes ühtneda mugoižehe projektaha. Ühthe videorolikaha paiči Suomalaiž-ugrilaižen školan openikoid ühtniba lapsed toižiš Petroskoin školišpäi. Hö sanuiba, miše oma vaumhed opeta karjalan da vepsän kelid, ku heid kucuižihe kuvadamha möst, sanub projektan ohjandai Galina Baburova.
Tegijad oma jo vaumhed ezitada kacujile ”Kuki-rikku”-videožurnalad. Videod voib kacta VKontakte-gruppas.
Projekt om tehtud Rahvahaližen da regionaližen politikan ministerstvan raha-abul.
