Kvantorium-teknopuisto peruššetah Kukonmäjellä
Šyyškuun 1. päivänä Petroskoin 2. koulušša avatah enšimmäini kaupunkissa lapšien Kvantorium-teknopuisto. Teknopuiston nykyaikaisie laittehie ruvetah käyttämäh biologijan, himijan, tietokonehopin, fiisikan tuntiloilla. Ne autetah koululaisie opaššušainehien profiilitutkimisešša. Alkeisluokissa uuvven teknikan avulla šuunnitellah viettyä tietofestivalija, muasteri-oppija ta temaattisie tuntija. Niin jotta koululaisilla varmašti tulou mukava.
Viime netälillä Petroskoin piämieš Vladimir L’ubarskii tutki vaštahotettuja laittehie ta niitä varoin valmissettuja tiloja. Vladimir L’ubarskii vieraili 2. koulušša Slavmo-maitotehtahan toimehpanijajohtajan Anatolii Buldakovin kera. Slavmo-yrityš rupesi 2. koulun tukijakši.
— Tämän partn’oritoiminnan piätarkotuš on šiinä, jotta lapšet šuahah nähä mimmosih ammattiloih hyö voijah opaštuo. Tämmöistä ammatillista ohjaušta pitäy alottua šuorittua jo koulušša ta jatkua erikoisalan opaššušlaitokšissa. Voit olla, jotta maitotehtahalla šyntyy projekti, min mukah šen spesialistit luajitah uušie pakkaukšie tahi, esimerkiksi, tehtahan ruatajat voijah viettyä koululaisilla käytännöllisie himija-harjotukšie. Varianttija on äijän. Koulun ta maitotehtahan johtokunnalla on mistä ajatella, korošti Vladimir L’ubarskii omalla VK-šivulla.
Kvantorium-teknopuisto peruššetah Obrazovanije-kanšallisprojektin rajoissa. Šen valmistamiseh käytettih 22 miljonie rupl’ua federalisešta b’utžetista.
