Tämbei äjiš küliš om ühtejitte problem – ei ole požaruitoid, vai oma, no ned oma kulud, ei rakoi, i ku süttub lämoi, požarmašinoile om jüged löuta vet. ”Rahvahan b’udžet”-programm abutab pätta nece küzund. Nügüd’ necen programman abul Kalagen elontahon koumes küläs — Kalages, Toižeges da Kaskezas, om tehtud uded požaruitod.
— Tämbeižeks päiväks Kalagen elontahos ei olend ni üht radajad požaruitod. Nece oli sur’ problem küläs. Nügüd’ se om pättud. Üks’ požaruitoišpäi om tehtud läz školad da pertid, meletan se om tarbhaine täs, sanui Kalagen külän administracijan pämez’ Mihail Pol’akov.
Sijaližed eläjad mugažo holduba, radaba-ik požaruitod.
— Nece om lujas sur’ azj tehtud. Ved’ kuluile požaruitoile om jo äi vot, ned om d’o kazdud, ii rakoi. Uposi, ku kus-ni zavodiše požar vai lämii, tal’vel požarmašinale ii voi putta ni Änežehe, ni jogenno, mise otta vet. A požaran aigan kaikutte minud om kalliž. A nügüd’ požaruitod radaba, ka hivä azj om, sanub Kalagen eläi Valentina Mironova.
”Rahvahan b’udžet”-programm om aktualine i tarbhaine, sikš ku äjad posadad oma edahan radajišpäi požaruitoišpäi. Om tärged ičeze aigan koheta niid, puhtastada vai tehta uzid.