“Korvakkahien” luo goistis
Ven’an kuulužan kirjuttajan Eduard Uspenskoin keksityl personuažal Čeboraškal vuvvennu 2021 täydyy 55 vuottu. Petroskoilaine Tatjana Anuhina keräilöy Čeburaškoi. Tänäpäi Tatjana Anuhinan keräilemäs on läs 500 Čeburaškua.
Tatjanan keräilemäh kuuluu pehmielöi bobazii, reppuloi, hammasšotkii, sobavuarnoi, neglottuloi da ommeltuloi Čeburaškoi.
Tatjanan ei-tavalline mieliruado sai allun, konzu häi oli täyttänyh 18 vuottu. Silloi roindupäiväkse Tatjanan dovariššu lahjoitti hänele Čeburaškan vestoksen, vestetyl Čeburaškal läpetettih silmät... Sit aijas meni jo 47 vuottu! Tatjana rubei iče ostamah Čeburaškoi, sit rubei nieglomah da ombelemah niilöi. Joga pruazniekakse Tatjanan dovarišat lahjoitetah hänele vesselii, hyväsydämellizii da eriluaduzii Čeburaškoi, sendäh ku tietäh: häneh niškoi se on paras lahju.
Tatjana Borisovna suvaiččou čomendua Čeburaškoil oman Uvven Vuvven kuuzahazen duačan pihas. Omii armahii persozuažoi häi pidäy ruokos. Niilöi on kaikkiel: pualičoil, škuapois, ikkunlaudazil. Omahizet ei olla vastah moizii korvakkahii yhteseläjii. Kerran oli moine šeikku, ku tuldih laukkah ostamah kaglupaikkua, a sen sijah ostettih kouran oman Čeburaškan kuvan kel.
Vie Tatjana on nerokas fotokuvuaju! Häi suvaiččou kuvata omii “dovariššoi” – istuttau niilöi veneheh libo kannole da luadiu fotokuvan. Tatjanan dovarišat šuutkah sanotah händy “čeburahnutunnuokse”, ga muailman eri čuppulois tuvvah vai uuzii Čeburaškoi mustolahjakse. Ku roinnou teilgi pädemättömii Čeburaškoi, Tatjana mielihyväl ottau net omah keräilemäh. Anna Čeburaškoin vessel pereh kazvau ielleh da miellyttäy emändiä da gostii.
