Kontupohjan kanšallisukšien välisen yhteistyön keškuš vietti 15-vuotisjuhlua
Pimiekuun 30. päivänä Kontupohjan B. J. Kravčenkolla nimitetyššä piirikeškuškirjaštošša piettih Kanšallisukšien välisen yhteistyön keškukšen 15-vuotisjuhlalla omissettuo iltua. Tilaisuš keräsi Karjalan toimehpanijan vallan elimien ta Kontupohjan piirin hallinon etuštajie, kanšalaisjärještöjen jäšenie, kulttuurilaitokšien ruatajie, luovie kollektiivija ta lehtimiehie.
Vuuvven 2007 24. elokuuta Kontupohjan piirikeškuškirjašton tiloissa avattih Karjalan enšimmäini Kanšallisukšien välisen yhteistyön keškuš. Laitokšen johtoh tuli Nadežda Tsikareva, kumpani ruato šiinä virašša 13 vuotta. Nykyjäh Keškukšen johtajana on Tatjana Rautio.
— Enšin meijän laitokšen piätarkotukšena oli auttua migranttien mukautumista, ka nyt emmä enyä hoija šitä, šentäh kun ajan mittah migranttien miärä tuntuvašti väheni. Meijän työn piäšuuntina ollah kulttuuri, šivissyš ta kotišeutuoppi. Kirjašton tiloissa toimiu Oma Kodi -kotišeutuoppikerho. Šen jäšenet vietetäh eri tutkimukšie, matkoja, issuntoja. Ennein kirjaštošša opaššettih karjalan kieltä, ka spesialisti jätti kaupunkin, kerto Tatjana Rautio.
— Haluomma näyttyä Karjalašša eläjien kanšojen kulttuurien monipuolisutta. Meilä on äijän yhtehisie projektija Petroskoin kanšallisien yhteisöjen kera. Meijän yštävinä ollah ukrainalaisen kulttuurin Kalina-šeura, Karjala – Šuomi -yštävyššeura, Karjalan marilaiset -šeura, Kanšallisien kulttuurien ta kanšanneron keškuš. Tavallisešti Keškukšen tilaisuot kerätäh äijän kävijie, lisäsi Keškukšen johtaja.
