Konkurs: Giperborei lapsiden keskes
Täl vodel Petroskoiš paiči ”Giperborei 2022”- tal’vfestivalid möst planuitas ”Giperborejan tal’vsarnad”-konkurs. Lapsed voiba naprida tehta vestatusid lumespäi da jäspäi.
Ühtnemaha konkursaha kuctihe školiden openikoid, lapsid päivkodišpäi da toižiden organizacijoiden kazvanikoid. Kaikutte ühtnik tebeb ičein joukun. Joukus voiba olda vanhembad, opendajad. Ühtnikoiden vestatusen temad voiba olda erazvuiččed. Tehta niid pidab lumespäi vai jäspäi.
― Žurijouk kacub ezmäi kaiked tön jugedusehe da čomudehe. Konkursas om eriline lahj ”Petran I jäl’gidme”- nominacijas. Se om omištadud ezmäižen venäläižen imperatoran 350-voččen jubilejale, sanub Ekaterina Šestakova.
”Giperborejan tal’vsarnad”- konkurs mäneb 2.-8.uhokud školiden da toižiden organizacijoiden sijas. Pakičuzaig lopiše 8.uhokud. Sädandradon fotod pidab panda VKontakte-gruppan al’bomaha.
