Karjalan piämieš Artur Parfenčikov allakirjutti miäräykšen hätätilajärješšykšeštä koko Karjalašša. Tašavallašša on IV tulipalovuarallisuon luokka. Šemmoni piätöš antau mahollisuon nopiešti antua rahua meččäpalojen šammuttamiseh šekä käyttyä enemmän varoja ta voimie taisteluh tulta vaštah.
Tulešta käršitäh melkein kaikki piirit, šuurimmat tulipalot ollah Karjalan luoteisošašša. Pelaštajat Leningradin, Arhankelin, Vologdan, Murmanskin alovehilta ta Piiteristä tultih auttamah šammuttamah tulipaloja. Tašavallan kaikissa piirilöissä tarvitah ni volont’orien apuo.
Tulipalojen pinta-ala kašvau. Täkši päiväkši Karjalašša on 33 tulipaluo 7 280 hehtarilla. Meččäpaloja šammutetah noin 700 ihmistä ta 150 tekniikan yksikkyö. Täštä päiväštä heitä ruvetah auttamah šata šotilašta.