Kojittomien elukkojen turvakojissa pietäh uuvvissukšie
Noin 140 – 150 koirua ta 60 – 70 kiššua eläy Petroskoin enšimmäiseššä yhteiskunnallisešša turvakojissa. Joka vuosi šielä parennetah elukkojen pitämisen oloja. Esimerkiksi, viime vuotena kiššoilla oli rakennettu uuši talo.
‒ Kun kišša piäšöy turvakotih šillä pannah kaikki tarvittavat rokotukšet, pietäh tervehyšhuoltopitoja, kačellah miten še voipi ta šiitä lähetetäh yhtehiseh tilah, missä kaikki kiššat eletäh ta kun kišša on šielä šillä ruvetah eččimäh uutta isäntyä, šelitti turvakojin ruataja Sabrina.
Uuvvešša talošša kakši tätä tilua on lämpimissä siistilöissä huonehissa, missä on kaikki kiššojen mukavalla elämällä, ka piäasieta, šuvaičijua isäntyä, ei ole. Šentäh turvakojin piätehtävänä on eččie isäntie elukoilla, kumpaset ei petetä enyä.
Toini tehtävä on vähentyä kojittomien elukkojen miäryä.
‒ Jo toista vuotta myö šuoriuvumma projektie, kumpasen mukah sterilisoimma elukkoja, jotta rajottua pentujen šynnytyštä. Toisien yhteiskunnallisien fondien projektit autetah meilä. Yhen šemmosen apuprojektin rajoissa rakennetah šuurempie ta mukavampie häkkijä koirilla, uuši halkoliiteri ta kunnoššetah teitä kojin lähellä, šano turvakojin johtaja Vladimir Ribalko.
Joka päivä kojittomat kiššat ta koirat tarvitah apuo, ne voijah šuaha šitä vain vapaehtosilta ihmisiltä, kumpaset annetah lahjoja ta makšuja. Noin šata elukkua joka vuosi šuau isännän. Šuurimpana toivomukšena on, jotta tänä vuotena tämä miärä kašvais.
