“Kodiman” jubilejaks avaitihe “Heledad henged”-foto-ozuteluz
Jubileivodel “Kodima” tegi fotokonkursan. Kaiked konkursaha ühtni 45 mest Petroskoišpäi, Piterišpäi, Piterin da Vologdan agjoiden vepsläižiš külišpäi. Konkursas oli kaks’ nominacijad: “Vepsläižed modod” da “Vepsläižed londuzkuvad”. Parahimad fotod “Vepsläižed modod” -nominacijas oli valitud ozutelusen täht, mitte tehtihe “Periodika”-painištos.
— Amu tahtoim ozutada vepsläižid modoid fotoiš. I täl vodel necen idejan todenzoitim eloho, fotoiš om ezitadud vepsläižiden erazvuiččed sugupol’ved: rauhad ristitud, keskigäižed, nored da lapsed, sanub “Kodiman” pätoimitai Irina Sotnikova.
Parahimad vepsläižed londuzkuvad mülüiba 2024. voden kalendarihe, mitte, kut vepsläižiden modkuviden ozuteluz-ki tehtihe Vepsän kul’tursebran ”Kel’ — minun kodima”-projektan abul. Molembiš nominacijoiš žurijouk valiči koume vägestajad.
Konkursan ühthevedod oma mugoižed: ezmäižen sijan ”Vepsläižed modkuvad”-nominacijas sai Al’ona Igamberdijeva Piterišpäi “Čajun jomine Ladvan emäganke”-kuvas, toižen sijan sai Angelina Čirkova Petroskoišpäi Vladimir Haritonovan modkuvas, koumanden — Gül’čehra Polivanova Piterin agjan Vidl-küläspäi “Baboid-mamšaižed”-kuvas. “Vepsläižed londuzkuvad”-nominacijas vägesti Jegor Frolov Piterišpäi “Ladv”-kuvanke, toižen sijan sai Maria Mironova Kalagespäi “Külän ehtaine”-fotokuvas, koumanden sijan sai Dmitrii Polivanov Vidl-küläspäi “Oiged rand”-kuvas. Kaik vägestajad saiba lahjoid da uzid kalendarid.
