Karjalaižiden, vepsläižiden da suomalaižiden ištund Karjalan pämehen ohjandusel mäni Petroskoiš. Ühtnikad pagižiba küzundoiš, miččed koskiba valdkundan tuges biznesale Karjalan municipaližiš rajonoiš, miččed mülüba Venäman Arktikan zonaha, sociologižes oppindan polhe karjalaižiden da vepsläižiden keskes, a mugažo siš, oma-ik vaumhed openduzorganizacijad tartta opendamha mugoižid openduzpredmetoid kut ”Kodikel’”,”Literaturlugend kodikelel” i ”Kodiliteratur”.
Tämbei kodikeliden urokoiden täht oma vepsän kelen, karjalan kelen livvin paginal da pohjoižpaginal ”Kodikel’”-openduzkirjad ezmäižespäi ühesandaha klassahasai. Mugažo Karjalan openduzministerstv vaumiči painusehe vepsän da karjalan kelen openduzkirjad 10.-11.klassoiden täht.
— Tarkatomad openduzprogrammad karjalan, suomen, vepsän ”Kodiliteratur” oma jo vaumhed ekspertizaks Venäman rahvahiden kodikeliden federaližehe institutaha. Vodel 2023 planuitas tehta ”Literaturlugend kodikelel”-openduzkirjoid augotižškolan klassoiden täht, sanui Openduz-da sportministran ezmäine varapämez’ Žanna Petrova.
Kaik openduzkirjad edištaba koume openduzčasud nedališ. No äjiš školiš kodikelen urok om vaiše üks’ kerd nedališ.
— Om hüvä, miše paindas openduzkirjoid, tehtas openduzprogrammoid. No om üks’ problem – nened openduzkirjad ei kožuba openduzprogrammaha. Kodikeliden opendajile ei täudu openduzčasuid, miše vodes antta kaiken programman lapsile. Pidab vajehtada programm vai tehta mitte-ni ližaprogramm opendusen täht, homaiči Zinaida Strogalščikova.
Miše pätta nece problem, ištundal pättihe tehta ohjanduzištund kodikeliden opendamižen tugedme.