Sulakun 20. päiväl praznuitas Vepsän da karjalan kirjkeliden päiväd. Kaikiden täht, ken tedab, opendab i navedib meiden valdkundan igähižiden rahvahiden kelid, tehtas äi erazvuiččid azjtegoid da konkursoid. Karjalan opendusen kehitoituzinstitut tegi ”Kirjamikko”-konkursan lapsiden täht, ken opendab karjalan, vepsän da suomen kelid Karjalan školiš.
Lapsile pidi valita sana karjalan, vepsän vai suomen kelel i pirtta se muga, miše ezmäine sanan kirjam oliži kuvatud kuval. Tehta kuvan voi erazvuiččiš tehnikoiš. Valitud sanan polhe pidi kirjutada pen’ tekst kodikelel i käta se venän kel’he. Kaiken konkursale oli oigetud 199 radod suomen, vepsän da karjalan kelil.
— Meiden školas konkursaha ühtni 11 openikad. Se tuli lujas mel’he lapsile. Lapsed surel tahtol johtutiba vepsläižid sanoid, peitiba kirjamid kuvihe. Nece om hüvä motivacii vepsän kelen opendamižen täht i hüvä voimuz lapsiden täht ozutada ičeze pirdandmahtoid, sanub vepsän kelen opendai Maria Mironova Kalagen školaspäi.
Ühthevedoid tehtas sulakun 23. päiväl. Lapsiden radoid vepsän kelel voib nägištada ”Kodima”-lehteses №5.