Uuši vuosi on jo kynnykšellä. Kipinä-lehen pimiekuun numeron šivuja šelaillen šie löyvät pruasniekalla omissettuja šivuja: luvet Ol’ga Smotrovan ta Sergei Jakovlevin runoja onnešta ta Pakkaisukošta šekä starinan Jermilkašta ta villišijašta.
— “Kipinän” verekšen numeron avulla lapšet voijah valmistua heti kakši uuvvenvuuvven luajošta – Roštuon šukan lahjoja varoin ta mukavan Pakkaisukon paperista uuvvenvuuvven kuušen koristamisekši. A uuvven kuvalehen korissukšena on vuuvven 2023 kirkaš ta kaunis kalenteri, kumpasen piirušti taiteilija Ol’ga Ikkonen, kertou “Kipinän” toimittaja Maikki Spitsina.
Šamoin kuvaleheššä šie löyvät mukavan starinan šilityšpualikašta, Kukkahoroskopin ta kertomukšen karjalaisen perehen elämäštä, šuat tietyä mintäh kalitta kyšyy kahekšua ta mintäh värttinyä ei šuanun pityä tyhjänä. “Kipinän” kyšelylistan avulla šie paremmin tuttavuššut omih yštävih, a Muhahukšet kantelistiloilla -kirjani opaštau šilma šoittamah viisikielisellä kantelella.
Kuin ainaki “Kipinäštä” löytyy kiinnoštavie tehtävie ta aivopähkinöjä purtavakši.