“Kipinä” tariččou kanarvočäijyn ta havumečän tuokšuo
Kuvalehen šivuja šelaillen šie löyvät mukavie starinoja Harakkamäještä ta Kanarvočäijyn pruasniekašta, luvet runoja kiššašta, koirašta, šijašta ta šiijašta, šuat tietyä millä yksi puulaji on “parempi” toista šekä mi merkityš on Elämän rattahalla. Šen lisäkši “Kipinäššä” on mukavie stolapelijä, onnittelukorttija ta piiruššukšie.
– Kuvaleheššä on ilmotettu uuši “Kipinän” 35-vuotispäivällä omissettu Onnittelukortti-kilpailu, kertou “Kipinän” toimittaja Ol’ga Smortova. – Ota ošua kilpailuh – piirušša oma onnittelukortti ta lähetä še Kipinä-lehen toimitukšeh 01. šyyškuuta šuaten. Parahat onnittelukortit palkitah ta julkaissah leheššä ta “Kipinän” nettišivulla.
Kipinä-kuvalehen kakši šuurta artikkelie on omissettu nuorilla karjalaisilla neiččysillä, kumpaset vaššatah kaikkie muotitrendijä, ka šamalla tykätäh ta kannatetah karjalan kanšallista makuo, perintehie ta tietyšti kieltä.
Täyzi vačču karjalazuttu -istorija kertou Anita Gundirevašta. Koštamukšešta kotosin olija karjalaini neičyt nyt eläy Leningradin alovehen Sestroretskissa. Anitalla on Havumeččä-internettikauppa, kummaista hiän ohjuau Instagram-sosialiverkošša. Kaupašša on esillä erilaisie suveniirija karjalaisien kirjutukšien kera.
Nuori karjalaini disaineri -kirjutukšešša šuat tuttavuštuo Anni Filippovah. 14-vuotini tyttö eläy Koštamukšešša ta ohjuau omua Kareliahome-etnošivuo Instagram-sosialiverkošša. Šivulla Annin lukijat voijah tuttavuštuo karjalaiseh kulttuurih.
– Tänäpiänä vähä keneššä nuorista niät kiinnoššušta omih juuriloih. Ka mie olen ylpie omašta rakkahuošta pieneh kotimuah. Nyt on paraš aika tutkie omua kieltä, kulttuurie ta perintehie šekä tuuvva niih mitänih uutta ta nykyaikaista. Vain tällä keinoin onnistuu šäilyttyä etnos, on varma Anni Filippovah.
Luve uutta “Kipinyä” šekä työnnä kuvalehteh omie kirjutukšie ta piiruššukšie!
