Šyyškuun 22. päivänä Periodika-kuštantamon tiloissa toimija lapšien Kičči-kočči -kehityšryhmä otti vaštah enšimmäisie opaštujie. “Periodikan” johtokunta ammuin šuunnitteli avata lapšien ryhmä. Konša tašavallan karjalaisien, vepšäläisien ta šuomelaisien kieliresurssikeškukšeh tuli uuši ruataja Alina Kartinen, nuoren spesialistin ta johtokunnan tahot oltih šamanmoisina. Alina on Petroskoin A. K. Glazunovilla nimitetyn konservatorijan piäštökäš ta Kantele-yhtyvehen nuorisostudijon entini administrattori. Hänen työkokemukšen ta alotuškyvyn anšijošta lapšien ryhmän projekti kehitty rutompah.
– Idejan toteuttamini vuati noin puolentoista vuotta – piti valmistua huoneh, oštua šoittimie, kerto Alina.
Enšimmäiseh tuntih tuli kolme kašvattie: veikot Danil ta Matvei ta Polina. Jotta helpottua tutuštumista kantelen kera, lapšilla näytettih šoittimen malli, kumpasešša joka jouši oli merkitty erähällä varillä.
Ryhmän toisena opaštajana on Kantele-yhtyvehen Aino-laulyryhmän artista ta “Kantelen” nuorisostudijon opaštaja Marina Tukkija.
– Halusima tutuštuo lapših ta šuaha tietyä heijän mahollisukšista, nähä mitein hyö tunnetah ritmie ta tilua. Käyttimä kanšanpelijä, jotta kaikki ois luonnollista, koroštau Marina.
– Tänä vuotena šuunnitelemma viettyä tuntija šyyškuušta talvikuuh šuaten, ka “Kičči-kočči” on pitkäaikani projekti. Tavallisien tuntien lisäkši meinuamma kuččuo Petroskoin näyttelijie, runoilijie, musikanttija, tanššijie ta toisie luovie ihmisie, jotta lapšet opaššuttais pakinataituo, tanššimah, valokuvuamah ta čukellettais luomistyön muailmah. Meilä on äijän idejoja, ka peittelemmä niitä. Vuotamma uušie kašvattija, lisäsi Alina Kartinen.