Työmatan aikana Karjalan tašavallan piämieš Artur Parfenčikov tapasi Kemin ašemalla Okt’abr’skaja-rautatien varajohtajan Vladimir Trojanovin ta kaččeli šen tärkien kulkušolmun uuvvistamisen ta turismin kehitykšen kyšymykšie.
Artur Parfenčikov korošti, jotta Venäjän rautateijen ta Karjalan halličukšen yhtehisien ponnissukšien anšijošta nykyjäh toteutetah projektie, kumpasen mukah Kemin ašemalla peruššetah kulkuvaihtošolmu.
Nyt autoašema šijottautuu rautatieašeman rakennukšešša, missä šen kassa on jo avattu. 150-paikkani vuotantašali on niise ašetettava. Tänä vuotena on šunniteltu viimeistyä rakennušta ulkopuolelta. Šisätöitä on luajittava enši vuotena. Lisäkši on järješšettävä šopiva paikotuš turistiautobuššija varoin.
Toisena tärkienä tehtävänä on korottua šen rautatien ošan kuletuškykyö, mitä tarvitah nopiemmalla ta halvemmalla tavarankuletukšella Venäjän pohjoseh.
– Volhovstroi–Murmansk-šuunnan kehittämisen rajoissa uuvvissetah rautatien ošua Kemin ta Belomorskin piirissä šekä Petroskoissa. Rautateijen insfrastruktuurin kehittämisellä ta kuletuškyvyn korottamisella Karjalan tašavallašša vuoten 2025 šuaten on šuunniteltu investoija noin 12 miljardie rupl’ua, korošti Okt’abr’skaja-rautatien varajohtaja Vladimir Trojanov.