Karjalazet: ket hyö ollah
Karjalan Rahvahan Liitto Rosmolod’ožin kannatuksel todevuttau projektua ”Rilsujem po-karel’ski”. Projektan hantuzis luajitah lyhyölöi videoloi karjalazien kul’tuurah nähte da kaksi julgavuo — paginsanakirju da bukliettu.
— Karjalan Rahvahan liiton piätavoittehennu ainos oli da on nuoren polven karjalan kielen da kul’tuuran säilyttämizeh da kehittämizeh suandu. Nuoret nygöi äijän aigua vietetäh tiedokonehen ies da telefonu käis. Juuri heih niškoi myö luajimmogi heile ellendettävii da mielužii lyhyzii videoloi da ei suurii julgavoloi, kudamis on tärgevimiä da mieldykiinnittäjiä tieduo karjalazih nähte, sanoi Oma Mediale Anna Jakovleva, Karjalan Rahvahan liiton piälikkö.
Bukliettoi, kudamis on kerrottu karjalazien kieleh, perindölöih da ruuttih nähte, ruvetah jagamah nuorile. Projektan hantuzis luajitah lyhyzii videoloi — 30 palua.
— Niilöis kerrommo nuorile, kui oigieh pidiä karjalazii ruuttii da mittuzet net pidäy olla, mittumii perindölöi, syömizii on karjalazil, mittuine kaunis on karjalan kieli, jatkau Anna Jakovleva.
Bukliettoi ei sua ostua, ga voibi suaja ilmai Karjalan Rahvahan Liiton pidolois.
Yhty Oman Median kanualah Telegramas!
