Karjalas radaškandeb “Konkretižed azjad” -programm
Vodelpäi 2026 Karjalas zavodib ičeze radon “Konkretižed azjad” -erine programm. Sen pätegend om pätta rajonoiden problemoid, miččil om kaiked enamb eläjiden abidkirjeižid. Regionan b’udžetaspäi sihe anttas 170 millionad rubl’ad, miš tedotadas Karjalan Zakonoiden tegendan kundan Telegram-kanalas.
Rahad jagadas valdkundan 17 rajonoiden da lindümbruzkundoiden keskes. Kaikutte taho sab 10 millionad rubl’ad. Nene rahad oigetas sijaližiden eläjiden pakičusihe. Pätusen programman rahoituses Zakonoiden tegendan kundan deputatad tegiba 4. tal’vkud.
“Konkretižed azjad” -erine programm om oigetud penihe, no tärktoihe azjoihe, miččed tariž tehta pigašti. Ozutesikš, Belomorskan rajonas nenil rahoil planuitas ostta tühjuz’mašin, miše puhtastada kanalizaciiverkod, da matkavtobus “Sosnovec—Pušnoi—Mašezero”-matkan täht, mitte ei radand pit’kha.
— Jogahižel municipalitetal om ičeze tarbhid da tegendoid. Ühtes pätam, kuna oigeta rahoid, sikš ku meile om ani tärged änestajiden pakičusid, om ani tärged tehta konkretižid azjoid ristituiden elon oloiden paremboitusen täht, sanui Zakonoiden tegendan kundan deputat Ol’ga Šmajenik.
Mugažo hän ližazi, miše om ani tärged tugeta sijaližid ičenaižid valdelimid. Uz’ programm abutab ristituile muga, kut abutaba tugirahad da vällenduzvelgad.
Kut sel’genzoiti parlamentan varapämez’, nece programm tehtas problemoiden heredan pätmižen radkaluks. Deputatad tahtoiba, miše nece programm radaiži joga voden.
Tarkištele "Oma Median" Telegram-kanalad!
