Karjalas kirjutadas saneluz karjalan da vepsän kelil

Akcii zavodiše 21. sulakud Petroskoin universitetan tedokirjištos. 6+ Kuva: “Saneluz karjalan da vepsän kelil” -akcijan VKontakte-grupp

Karjalan eläjid kuctas ühtnemaha jogavoččehe “Saneluz karjalan da vepsän kelil” -akcijaha, mitte mäneb 21.—27. sulakud. Akcijan päsijan linneb Petroskoin universitetan tedokirjišt. Täl vodel sanelusen tekstad om omištadud Suren voinan Vägestusen 80-voččele jubilejale.

— Tähäsai olem jo sanuded 73 oficiališt pakičust sanelusen tegemižehe. Täl vodel Karjalas akcijaha ühtneba kaik valdkundan municipaližed rajonad da ümbruzkundad, lidnoiden ümbruzkundad, sanui “Oma Media” -portalale Karjalan rahvahaližen da regionaližen politikan ministerstvan päspecialist Jekaterina Smirnova.

Paiči Karjalad saneluz pidetas Murmanskan, Piterin, Tverin da Vologdan agjoiš.

Männudel vodel neche akcijaha ühtni enamba 1 200 mest. 

Sanelusen pätegii om Karjalan rahvahan sebr, mugažo akcijad tugedab Karjalan Rahvahaližen da regionaližen politikan ministerstv. Saneluz tehtas Karjalan Valdkundan Pämehen grantoiden fondan abul.

Uzištoid neciš temas voib lugeda mugažo karjalaks, suomeks da venäks.