Piäsi ilmah karjalankielisen Kipinä-kuvalehen elokuun numero. Leheššä aina on äijän arvailtavua, luvettavua, leikattavua ta muistih pantavua.
Kuvalehen šivuja šelaillen löytyy mukavie starinoja kirjavašta kanašta, oravašta tai koiranpennušta, voipi lukie kertomukšie muššista kenkistä ta pienistä jänösistä, šuaha tietyä karjalaisen talon tärkeistä kotivehkehistä šekä karjalaisen mekon šaloista. Šen lisäkši “Kipinäššä” on mukava muasteri-oppi, kaunehie runoja ta piiruššukšie, a lehen korissukšena on tuntijärješšyš tulijakši opaššušvuuvvekši.
Kuvaleheššä on ilmotettu uuši Rippuja kukkani -kilpailu. Ošanottajien pitäy luatie kukkani käyttyän “Kipinän” muasteri-oppija tai kekšie oma kukkani, riputtua kaikki luatimat kukkaset uuvvenvuuvven kuušeh ta ottua ne valokuvah. Parahat työt palkitah ta julkaissah “Kipinäššä”.