Karjalan tavarat kyzyttävien joukos
Karjalan tavarat puututtih Ozon-internetlaukan kyzyttävien joukkoh. Alovehelline Luajittu Karjalas -vitriinu kuuluu muan 53 alovehes kolmen parahien joukkoh.
Kaikis puaksuvimah ostetah elättilöile tarkoitettuloi tavaroi, syömizii, rohtoloi tervehyökse da voidieloi kaunehuokse. Nygöi alovehellizen Luajittu Karjalas -vitriinas on ezitetty 14 paikallizen valmistajan enämbi 580 tavarua.
— Vaigu talvikuun aigah karjalaine tuotando kiinnitti enämbän migu 12 tuhanden ostajan mieldy, ilmoittau Karjalan tevolližus- da torrunministerstvan lehtistöpalvelu.
Omatahtozen sertifikatsien Luajittu karjalas -sistiemu oli pandu kirjoile keviäl vuvvennu 2018. Sen virrallizennu operuattorannu on Karjalan tazavallan kehityksen korporatsii. Karjalan tazavallan piämiehen Artur Parfenčikovan käskys Karjalan tevolližus- da torrunministerstvu auttau karjalazii tuottajii omien tavaroin ostajien puoleh eistämizes.
— Karjalazien brendoin federuallizile torguloile piäzy on tärgei ruado, kuduan vuoh sellitämmö kerras mondu kyzymysty: suurendammo tuotehmiärii da luajimmo uuttu ruadokohtua, samal luajimmo Karjalas tundietun da tuttavan alovehen, kus luajitah kyzyttävii tavaroi korgiedu luaduu, sanoi Karjalan tevolližus- da torrunministerstvan piälikkö Svetlana Astahova virraston lehtistöpalvelule.
Jogahine paikalline tuottai voibi kiiändyö Moi biznes -keskukseh da laboratourizien tutkimuksien jälles suaja mahto käyttiä omah tavarah niškoi Luajittu Karjalas -tavarmerkii. Sen omistajat suajah kebjiembäh eistiä omii tavaroi ostettavikse tazavallas da Ven’al. Paiči sidä heil rodieu ližävöidy ballua Karjalan tevolližus- da torrunministerstvan kilboih yhtyjes da sen abuvaroi suajes.
Aihies voit lugie suomeksegi.
Yhty Oman Median kanualah Telegramas!
