Karjalan ta šuomen kielen kehittämisen alan spesialistit vaštauvuttih Koštamukšešša Šuomelaini šykyšy Karjalašša tilaisukšien šarjan, mi loppu eklein ta Uhut-šeuran Kantatuattojen kieli ei šua šammuo -projektin rajoissa.
Mitein opaštua kieltä kouluissa mukavašti? Kalevalan ta Koštamukšen koulujen opaštajat ta kielialan aktivistit kerrottih, mitä keinoja käytetäh, jotta kielien opaštumini miellyttäis lapšie.
– Meilä oli tärkietä šuaha kokemušvaihtuo. Ennein myö kävimä Koštamukšešša rikeneh, olima kouluissa oppituntiloilla, a nyt pitän ajan kuluttuo oli hyvä tuaš vaštautuo. Uhut-šeuralla on šaman alan projektija ta ratkaissettavie proplemoja Koštamukšen Viena-šeuran ta Arhippa Perttusen šiätijön kera. Toivomma, jotta tulovaisuošša onnistuu kehittyä yhteistyötä ta šuaha hyvie tulokšie. Vaštavukšešša šopima, jotta Kalevalan ta Koštamukšen koulut järješšetäh koulujen opaštujien vaihto, voit olla järješšämmä konserttimatkoja, jotta lapšet nähtäis, miten opaššutah kieltä nuapuripiirissä, kerto Valentina Kovalenko, Uhut-šeura -yhteiskunnallisen järještön johtaja.
Koštamukšešša täštä vuuvvešta alkuan karjalan kieltä opaššetah kahešša koulušša: yheššä lapšet opaššutah šitä lisäainehena toista vuotta, toisena enšimmäistä vuotta kouluohjelman rajoissa. Molommat koulut ollah valmehie kehittämäh yhteityötä kielikehittämisen alalla.
Šuomen kielen opaštamiskehitykšen kokemukšešta kerrottih Koštamukšen šuomen kielen opaštajat. Koululaiset aktiivisešti ošallissutah tašavallašša pitämih tilaisukših ta näytetäh hyvie tulokšie. Viena-šeuran jäšenet omašta puolešta luvattih auttua ta kannattua kouluja karjalan šekä šuomen kielen opaštumisešša.