Ozuttelu avatah Karjalazien runoloin vuvven hantuzis. Nähtäväkse pannah läs kolmiekymmendy ruaduo: akvarellikuvua da vestokuvua. Muite muis ozuttelu roih sendäh mindäh sen piäs ei roita vai tutun Kalevala-eeposan juonet da hahmot, a leviembästi karjalazet runot, kudamii enne karjalazet taidoilijat ei kuvattu. Pohjakse on otettu Viktor Jevsejevan 1950-luvul jullattu kniigu “Karjalazet eepizet pajot”, kudamah taidoilijat tuttavuttih piädykauti.
– Kuvien luojien keskes on nuordu rahvastu, erähät kudamis annettih omat ruavot mierole nähtäväkse ezmästy kerdua. Taidoilii Žanna Sviridnikova pidäy piirdämizen pajan Vieljärven školaniekoile. Programmas on plein air – taidolijat tahtotah piirrellä Vieljärvie da suaha induo karjalazes kyläspäi.
Vieljärven kylä on vallittu sendäh, ku täs ruadau Karjalan Kielen Kodi da täs kyläs eläy rahvastu, ket vie tietäh karjalazien vahnoi perindölöi, sanou Karjalan Kielen Koin ruadai Natalja Antonova.
Ozuttelu rubieu ruadamah 19. kylmykuussah. Sil päiväl vieljärveläzet ruvetah karjalan rahvahan tabah pominoimah Paraskovjua Ivanovua, kudaman kuolendupäiväs meni päten viizikymmen viizi vuottu. Paraskovja Ivanova oli kuulužu Vieljärven čupun runoloin lad’d’ai da pajattai, karjalazien tiedoloin da neroloin kandai.
Karjalazet eeppizet pajot -ozuttelu rodieu kaksikieline, ven’akse da karjalakse.