Kirjazen suajien luvettelos ollah Karjalan piämies Artur Parfenčikov, tazavallan halličukseh da Priäžän piirin johtajistoh kuulujat ristittyöt. Karjalan Kielen Koin paginanvedäjän Ol’ga Gokkojevan ualkirjutetus kirjazes kyzytäh alallistu, pitkyaigastu abuu Koile. Yhtevyksen tarbehien mugah, abuu pidäs metodistan palkattuh ruadoh, muanvuogruhinnan pienendämizeh da kielipezän ruandah. Karjalan Kielen Kodi kyzyy virgumiehii kehittämäh juuri mostu sistiemua, kudamua myö vois auttua Kodii jiähä jalloil da kehittyö edehpäi.
”Karjalan Kielen Kois vois luadie uvvet ruadokohtat… Ilmai valdivollistu abuu eistymisty edehpäi ei voi tulla. Olemmo valmehet yhtes tazavallan virguniekoinke paista karjalan kielen iellehpäizes kehitykses da omas ruvos”, suau lugie yhtevyksen sivustol kirjazen ual. Sen ližäkse aktivistat luajittih internetkyzelyn, kudamas kyzytäh rahvahale midä mieldy hyö ollah, lunnastigo Karjalan Kielen Kodi tädä jen’guabuu vai tazavallan b’udžetas on muudu tärgiembiä menoidu.
Täkse aigua Karjalan Kielen Koin jen’gutagukset ollah lahjoittajien varat, projektoin vuitit, yhtevykseh kuulujien ristittyzien omat varat da Koin lunnastetut jen’gat, sanommo, piirualoin myöndis.