Kirjan mallin luatijana on Karjalan taiteilija Osmo Borodkin. Hiän valmisti šen noin 1947–1949 vuosina Kalevala-eepossan enšimmäisen painokšen 100-vuotisjuhlakši, konša oli ilmotettu eepossan kuvittajien kilpailu.
— Malli on ainutluatuni esineh musejošša. Yli 350 šivulla on kirjutuškonehella painettu teksti ta lukusie huomautukšie: min kokoni kuvituš missä kirjan tai šivun ošašša pitäis olla, šelitti esitykšen vetäjä, Karjalan kanšallisen musejon ruataja Sofja Nikitina.
Malli oli tarkemmin tutkittu Šukupolvien muisto -näyttelyn valmistelun aikana. Šen jälkeh musejon ruatajilla šynty uušie tehtävie – enšimmäini niistä on yhistyä runojen teksti kuvitukših šekä taiteilijan kommenttiloih. Šiitä pitäy valmistua tevokšen esittely leviemmällä yleisöllä.
Kirjan malli piäsi musejoh vuotena 1983, šitä ennein še šäily taiteilijan pereheššä. Osmo Borodkin oli šyntysin Vienan Karjalan Oulankan kyläštä. Šielä karjalaiset runot ilmeššyttihki ta Elias Lönnrot kävi niitä keryämäššä. Osmo Pavlovič tykkäsi karjalaisie runoja lapšuošta, šentäh kun kuuli niitä tuatolta ta ukolta.