Karjalan disainilla omissettu näyttely avattih Moskovašša
Näyttely on omissettu Karjalan ta Venäjän pohjoisalovehien disainilla ta käsitöillä. Esillä on Kekšitty ta luajittu Karjalašša -kilpailun voittajien luajokšie: ašteita, huonehtarpehie, tekstiili, kotikaunissušesinehie.
– Viime ta tänä vuotena Karjala on oikein šuosittu matkuštamiskohta moskovalaisilla. A niijen luokši, kenen kuitenki ei onnistun käyvä tašavaltah, Karjala iče tuli ativoih, meijän musejon šalih. Näyttely, kyllä, auttau ymmärtyä pohjoiskanšan filosofijua, šano musejon Muoti- ta disainikeškukšen johtaja Natalja Loginova.
Karjalan disainin kehittymini on vašta alkan, ka še jo nyt šynnyttäy kinnoššušta ta näyttäy Karjalan käsityöperintehien rikkahutta.
– Myö toima näyttelyh šemmosie esinehie, kumpaset esitetäh, mitä Karjalan disaini on. On äijän kaunissušesinehie kotie varoin, šentäh kun pohjoisalovehien eläjillä on oikein tärkietä, jotta oma koti olis lämpimänä ta mukavana, kerto ECHO-liiton johtaja Svetlana Kol’čurina.
Kekšitty ta luajittu Karjalašša -kilpailun ta näyttelyn järještäjinä ollah Karjalan etnokulttuurikeškukšien ECHO-liitto ta Venäjän disainerien liiton Karjalan ošašto. Liittojen jäšenet järješšettih toimenpitoja Pohjoiskäsitöijen koodi -projektin rajoissa Presidentin granttien šiätijön ta rajanylittäjän Karelija-ohjelman kannatukšella.
