Karjalan ta vepšän šanelu pietäh tänä vuotena 20. – 25. šulakuuta. Petroskoissa še kirjutettih tänäpiänä Petroskoin valtijon yliopistošša.
– Yli 70 ihmistä tuli tarkistamah, kuin hyvin hyö ošatah kirjuttua karjalakši tahi vepšäkši. Täštä päiväštä alkuan netälin aikana 60 paikašša Karjalašša, šekä Leningradin, Tverin ta Vologdan alovehella kirjutetah šanelu kaikilla karjalan kielen murtehella, šekä vepšäkši, kerrottih Karjalan kanšallisen ta alovehellisen politiikan ministerijön etuštujat – aktijon järještäjät.
Šeurata aktijon uutisie šuau toimenpivon ryhmäššä VK-sosialiverkošša. Karjalan kielen šanelun tekstit julkaissah Oma Mua -leheššä №16. Šuaha ošallistujan tovissuš šuau šulakuun 26. päiväštä alkuan Karjalaisien, šuomelaisien ta vepšäläisien kieliresurssikeškukšešša.
Toimenpito järješšettih Karjalan kanšallisen ta alovehellisen politiikan ministerijö Karjalan Rahvahan Liiton ta Vepšäläisien kulttuurišeuran avulla.
Muissutamma vielä, jotta Karjalan kielen šanelu pietäh niise Karjalan kielen netälin puittehissa. Šen ohjelmah šuau tuttavuštuo täššä.