Karjalaiset otettih ošua šuomelais-ugrilaisien kanšojen forumih
Venäjän šuomelais-ugrilaisien kanšojen forumi piettih Iževskissa kešäkuun 3. ta 4. päivinä. Forumih tuli šuomelais-ugrilaisien kanšojen etuštajie Venäjän 30 alovehelta. Tapahtumah otti ošua 450 ihmistä, hyö käsiteltih kulttuuriperinnön šäilyttämisen ta kehittämisen kyšymykšie.
– Toimenpitojen esitykšet ta mukava mielenpitojen vaihto niijen jälkeh autetah löytyä uušie partn’orie ta šuunnitella uušie projektija. Kaikista terävimmät keškuštelut košettih muamonkielen opaštumiskyšymykšie, kerto Karjalan delegatijon jäšen, kanšanrunouven tutkija ta toimittaja Valentina Mironova.
Juhlalliset avajaiset piettih Iževskin ooppera- ta balettiteatterissa. Šen aikana paistih kielen ta kulttuurin šäilyttämisen proplemoista, niise käsiteltih joukkoviestimien kehityštä ta nuorisoprojektija. Šen jälkeh kaupunkin keškiaukivolla piettih šuuri konsertti, missä esiinnyttih kaikkien kanšojen etuštajie. Karjalan puolešta esiinty näyttelijä Andrei Gorškov.
Tänäpiänä forumissa toimi muutoma ošašto. Yksi niistä oli omissettu kanšallisien kielien kehittämisellä internetissä. Karjalan kokemukšešta kerrottih Oma Media -portalin ta Karjalan TV- ta radijoyhtijön ruatajat.
Forumin järještäjien šuunnitelmissa on pityä šitä joka vuosi erilaisilla šuomelais-ugrilaisilla alovehilla.
