Täs tal’vkus ”Graniitti”-kul’turkeskus ühtes ”Eridan”-studijanke tegeb ”GraniittiFest 2021”-festivalin. Sil ozutadas erazvuiččiden rahvahiden lapsiden töd. Neche festivalihe mülüb völ pirdatusiden konkurs, miččen nimi om ”Karjala-suomalaižed sarnad”.
―Idei tehta konkursan tuli, konz mö tegim videosarnoid meiden Youtube-kanalan täht. Voim sanuda, miše varastam läz 300 pirdatust Suomespäi da Venämalpäi. Nügüd’ mö jo sam töid Petroskoišpäi, Piterišpäi da Smolenskaspäi, sanuba ”Graniitti”-keskusen radnikad.
Ičeze töd voib oigeta 26.päivähasai kül’mkud. Kaik ühtnikad saba diplomad. Vägestajid, miččed saba arvokahad lahjad, valičeb žürijouk.
― Minä olen sündnu Karjalas. Laps'aigas minai oli ”Karjalaižed sarnad”-kirj. Siš oli Tamara Jufan kuvid. Muštan niid lujas hüvin. Mö tahtoim libutada tahtod lugemaha sarnoid meiden lapsil, sanub žürin ohjandai Ol’ga Liukkonen.
”Graniitti”-kul’turkeskus lapsiden täht radab Helsinki-lindas. Se abutab venäläižile lapsile harjeneda elämaha Suomes, tegeb konkursoid da vastusid, kus lapsed voiba kosketadas.