Karjala ühtneb “Sur’ etnografine saneluz” -akcijaha
Karjala udes ühtneb “Sur’ etnografine saneluz” -tedotelendakcijaha (6+), mitte mäneb online- da offline-formatoiš kanman Rahvahan ühtmuden päiväd. Akcijan pätegii om Rahvahuziden azjoiden federaline agentstv, miččele Karjalas abutab rahvahaližen da regionaližen politikan ministerstv.
Ühtnikoile, kudambile om 16 vot i vähemba, om vaumištadud 20 ühthižfederališt küzundad. Niile, kelle om 16 vot i enamba, tariž antta vastused 30 küzundoihe, miččišpäi 4–5 tehtas video-formatas. Täl vodel, Kodiman kaičijan vodel, ezmäižen kerdan sanelusen istorijas ičeze videoküzundoid vaumištaba eriližen voinoperacijan ühtnikad.
Sures etnografižes saneluses voib sada ei enamba 100 ballad, kaiked tegendoihe anttas 45 minutad. Ühtneda sanelusehe voib kut Internetas, muga eriližesti vaumištadud sijoiš-ki. Internetas antta vastused küzundoihe voib 1.—8. kül’mkud akcijan oficialižel lehtpolel.
Petroskoiš offline-formatas saneluz mäneb 7. kül’mkud 15:00 časud Karjalan Valdkundan Rahvahiden sebruden kodiš. Sen ližaks Karjalas om voimuz ühtneda akcijaha Pudož-lidnas, Kalevala- da Šoutjärv-küliš. Oiktad vastused anttas sanelusen lehtpolel 11. kül’mkun päivähasai.
— Karjalan eläjad andaba vastused küzundoihe ani aktivižesti kut online, muga offline-ki. Sil vodel mö varastam enamba ühtnikoid, mi tobjimalaz, sikš miše akcijaha planuitase ühtneda školad da opištod, miččed ei tehnugoi sidä ende, sanui “Oma Media” -portalale Aleksandra Jeršova, ravhahaližen da regionaližen politikan varaministr.
Ezmäižen kerdan “Sur’ etnografine saneluz” -tedotelendakcii mäni vodel 2016. Projektan idei sündui Udmurtias. Siloi sanelusehe ühtni läz 90 tuhad mest. Mugoine akcii andab voimusen tarkištelda ičeze tedoid Venäman rahvahiden tradicijoiš, keliš, istorijas da kul’turas.
Uzištoid neciš temas voib lugeda mugažo karjalaks da suomeks.
Tarkištele "Oma Median" Telegram-kanalad!
