Karjalašša vietetäh naisien forumi
Šuunnitelman mukah XVI Karjalan naisien Uuši avaruš -forumi pietäh Petroskoissa kešäkuušša. Kevätkuun 8. päivän kynnykšellä pietyššä tapuamisešša Karjalan kanšalaisjärještöjä ohjuajat naiset ehotettih alovehen piämiehellä tilaisuon elvyttämistä. Artur Parfenčikov hyväkšy šen idejan.
– Forumissa myö pakajamma omista šuavutukšista ta kaččelemma, millä aloilla pitäis vahvistua yhteistyötä. Erityisešti pakajamma kanšallisprojektiloista. Opaššuš, demografija, tervehyšhoito, ekologija kuulutah aloih, millä myö voisima auttua toimehpanovallan elimillä, korošti Venäjän naisien liiton alovehellisen ošašton johtaja Jelena Mališeva.
Karjalan naisliikkehellä on pitkä istorija. Enšimmäini forumi piettih 60 vuotta takaperin. Tapuamisen ošallistujien mieleštä on tärkietä šäilyttyä perimistä. Hyö ušotah, jotta forumi auttau ei aunuoštah naisie, vain koko tašavaltua.
