Karjalašša otettih käyttöh Vienanmeren kallivopiirrokšet -vierailukeškuš
Karjalašša otettih käyttöh Vienanmeren kallivopiirrokšet -vierailukeškuš. Objekti on rakennettu tašavallan individualisen kehityššuunnitelman mukah.
Karjalan tašavallan halličukšen varapiäministeri Viktor Rossipnov kerto, jotta Zalavrugašša otettih käyttöh šuuri objekti — Vienanmeren kallivopiirrokšet -vierailukeškuš.
— Rakennuš tuli tosi kaunehekši ta mukavakši. Šuurešša miärin še on konseptijon luatijan, arhitektorin Jevgenii Tajevin anšijo, kirjutti varapiäministeri omašša Telegram-kanavašša.
Vienanmeren kallivopiirrokšet -vierailukeškukšeh kuuluu 40-paikkani hotelli, 150-paikkani kahvila, näyttely- ta konferenššišali. Keškuš antau noin 75 uutta työpaikkua.
Šamoin Viktor Rossipnov kerto toisešta šuurešta objektista, kummaista rakennetah tašavallan individualisen kehityššuunnitelman mukah. Sortavalašša luajitah infrastruktuurie lapšikkahilla perehillä Sovhoznoje-piätien lähellä, missä on noin 100 muapalua individualista elinrakentamista varoin, muun muašša lapšikkahilla perehillä. Objekti annetah tänä vuotena.
— Šielä on ašetettu vesijohto-, viemäri-, pihavaloverkot, on kunnoššettu tiet ta läpiajot. Šen takie muapalojen kapitalisointi kašvo. Valmistauvumma alottamah katujen ta läpiajojen asfaltoiččomista, kerto Viktor Rossipnov.
Varapiäministeri korošti, jotta molommat objektit vuajittih enemmän projektidokumenttien kannalta, min takie niijen käyttöhotto viipy.
Aihiešta voit lukie niise šuomekši.
