Kanzalline poliitiekku: kannatetah monikielisty kul’tuurua
Vuvvennu 2026 Karjalan tazavallan varoil kannatetah kanzalliskielizien julgavoloin painandua da pietäh lähes 200 piduo tazavallan kanzoin moniluaduvuon säilyttämizekse.
— Kanzalliskielizet julgavot ollah meijän tazavallan ei vaigu merkinny, net ollah tärgei keskus, kus säilytetäh karjalan da vepsän kielii, sego kannatetah suomen kielen käyttyö Karjalan tazavallas, andau tieduo Kanzallizen da alovehellizen poliitiekan ministerstvu omassah VKontaktas.
Ministerstvan mugah kanzalliskielizet julgavot silmännägeväh ozutetah, ku meijän tazavaldu effektiivizesti täyttäy kanzallizien kielien säilyttämizen da edeh päi eistämizen ruaduo nygyololois.
Periodikia-julguamo, kuduan levon al ollah karjalankieline Oma Mua, suomenkielizet Karjalan Sanomat, vepsänkieline Kodima, Carelia- da Kipinä-žurnualat, kduamis on lugemistu karjalakse, vepsäkse da suomekse, on perustettu vuvvennu 1991 da se alalleh suau varua tazavallan b’udžietaspäi. Sen hyvyös Kanzallizen da alovehellizen poliitiekan ministerstvan sanoin mugah Karjal säilyttäy omassah kul’tuuru-histouriellistu perindyö.
— Karjalan haldivon kannattamizen vuoh tazavallan eläjät täytetäh oma Konstitutsien mugaine oigevus tiedoloin suandah omal kielel, tundietah, ku yhtytäh yhteiskunnan elaigah da ellendetäh oman kul’tuurizen omaničentunnon arvokkahuon. Meijän lehtet da žurnualat ollah nygyaigaizet julgavot, kudamis kuvastuu eri ahiedu — ekonoumiekas da sotsiualualalan kyzymyksis hengellizeh kul’tuurah da Karjalan perindölöih suate, kerdou Periodika-julguamon piälikön Jevgenija Šustovan sanoi Kanzallizen da alovehellizen poliitiekan ministerstvu.
Tulien vuon paiči kanzalliskielizii julgavoloi Karjalan tazavallan varoi pietäh moizih pidoloih, kuduat kannatetah tazavallas eläjien kanzoin moniluaduvuttu.
Yhty Oman Median kanualah Telegramas!
