Karjalan kanšallini laulu- ta tanššiyhtyveh “Kantele” täyttäy tänä vuotena 85 vuotta ta šen nuorisostudijo 20 vuotta. Merkkivuuvven puittehissa Karjalan musiikkiteatterin lavalla näytettih Kandelehen heimoveh -konserttiohjelma.
Kantele-yhtyvehen kolme šukupolvie: veteranit, nykyset artistat ta nuorisostudijo esiinnyttih šamalla lavalla juhlapäivänä.
– Nuorisostudijon kašvattiloilla še oli enšimmäini esityš šuurella lavalla. Ohjelma oli taitavašti valmissettu ta konsertti mäni hyvin. Kirkkahat ilon muhahukšet oltih kuin artistoilla, niin ni kaččojilla, šano “Kantelehen” lehistöpalvelu.
Laulu- , musiikki- ta tanššiesitykšissä otti ošua yli 150 ihmistä. Vanhemman ta nuoremman šukupolven yhisti rakkahuš karjalaisella perintehellisella šoittimella – kantelehella. Konsertin lopušša lavan lähellä keräyty äijän kaččojie, kumpasilla himotti onnitella artistoja ta lahjottua kukkie. Lapšet niise šuatih muistolahjoja, kumpaset oli oššettu sponsorirahalla.