Kalevalan kirjaštošta tuli lukemisen keškuš
Peruškorjauš on lopetettu Kalevalan kirjaštošša. Šielä uuvvissettih tilat, oššettih uutta tekniikkua, varuštehie, huonekaluja. Kirjašton avajaisih tuli piirin ta tašavallan viranomaiset.
— Še on merkittävä tapahtuma Kalevalalla. Olen varma, jotta vielä enemmän pos’olkan eläjyä ta vierašta käy šinne. Lukemisen keškukšešša nyt on lautapelijä, kirjafondih tuli 1400 uutta kirjua, esimerkiksi värikkähät kirjat lapšilla tahi klassisen kirjallisuon kappalehet, šano kirjašton avajaisissa Karjalan kulttuuriministerin enšimmäini šijähini Sergei Solovjov.
— Mukavissa tiloissa paikkua löytyy pienemmillä ta vanhemmilla lapšilla, koululaisilla, aikuhisilla, vanhemmalla šukupolvella. Meijän lukemisen keškuš tuli ainutluatuisekši ta omaperäisekši, lisäsi kirjašton piämetodisti Inna Nazukova.
Kirjašton helmenä on Kalevala-eepossalla omissettu sali. Šiinä löytyy kotišeutukirjallisuutta. Niise keškukšešša on tilua kuvataiteilijien näyttelyjen esittämisekši ta luovien toimenpitojen pitämisekši.
Kirjašto oli korjattu Kulttuuri -kanšallisen projektin rajoissa. Karjalan šuunnitelmissa on vuuvvekši 2023 lopettua yhekšännen tämmösen kirjašton korjaukšen.
