Kalevala-runoelman urhomiehet annetah viritysty kilbuniekoile
Kandurahvahien kielien kanzoinvälizen kymmenendeksen hantuzis pietäh kilbu ”Piirustammo Kalevala-runoelman juondehii” (16+), kuduah kučutah Petroskoin valdivonyliopiston kaikkien instituutoin opastujii, magistroi, ordinuattoroi, aspirantoi. Kilvan luadijat ollah Filolougien instituutan baltiekkumeren-suomelazen filolougien laitos da Pedagougiekan da psiholougien instituutan tehnolougien, taijon da dizainan laitos.
— Mennyt vuon meijän laitoksen kehoitukses oli pietty kilbu, kuduah otimmo karjalazien, vepsäläzien da suomelazien suarnoin pohjale luajittuloi piirustuksii da mualavuksii. Kilbah yhtyi piäl puolen sadua hengie. Tämän vuvven kilbah sežo vuottazimmo äijän kilbuniekkua. Kučuimmo yhtymäh sih Komin da Udmurtien opastujii, sanoi Oma Mediale baltiekkumeren-suomelazen filolougien laitoksen piälikkö Tatjana Paškova.
Kilburuadoloi otetah vastah kevätkuun 31. päiväh suate adresil: Petroskoi, opastuskorpussu n:o 1 (Anohinan uuličču, 20), perti 212, Baltiekkumeren-suomelazen filolougien laitos. Paiči kilburuaduo pidäy työndiä ilmoituskirjaine sähköpoštale ližävömerkin kel ”Kalevalan runoloin urhomiehet”.
Kilbua pietäh kahtes nominatsies: ”Eeppizen urhomiehen kuva” da ”Runokuva”. Kilvan arvostajat kilburuadoloi arvostajes pietäh silmäl kilvan aihien noudamistu, kilburuavon tazuo, idein erinomažuttu da syväindyö, ruavon luaduu da kanzallizen aihien noudamistu da tovelližuttu.
Kilburuadoloi voibi luadie eri tabah, vastah otetah graafiekku-, mualuamis- da dekoratiivuruadoloi. Joga nominatsies kilbuniekas otetah ei enämbiä kolmie ruaduo. Kilburuado ei pie olla suurembi A5-formuattua.
Kilvan tulokset ilmoitetah sulakuun 15. päiväh suate. Voittajat suajah diplomat. Kilbah nähte luajitut piirustukset da mualavukset pannah ozutettavakse Petroskoin yliopiston piäkorpussah.
Aihies voit lugie vepsäkse, suomekse da ven'akse.
