Kalevala-eposad pigai lugeškatas vepsäks
Juminkeko-fond, mitte radab Suomen Kuhmo-lidnas i om Karjalan kul’turan da Kalevela-eposan tedokeskuz, vodespäi 2002 kerdan kümnes vodes omištab voden vepsän kul’turale. Nece znamoičeb, miše Vepsän kul’turan voz’ linneb jo 2022. vodel. Fondas planuitas tehta äi erazvuiččid azjtegoid. Päazjan om Kalevelan kändmine vepsän kel’he.
Kalevala om kätud äjihe mirun kelihe. Epos oli jo kätud vepsäks lapsile da norištole vodel 2003. Nügüd’ Nina Zaiceva, vepsän kelen tedomez’ da kändai, zavodi tehta täuden Elias Lönnrotan Kalevalan kändmižen vepsän kel’he.
— Vepsän kel’ om baltianmeren-suomalaine, no ei muga läz suomen kel’he, kut karjalan kelen paginad. Siš ei ole erasid sanoid, predmetoid, tärtusid, ei ole erasid grammatižid formid, kut suomen keles. No neciš om ičeze-ki hüvä pol’, sikš ku tarbiž pidäda muštos kaik kelen vaihišt, olda kaiken aigan neniden sanoiden mirus, i nece om ilo südäimele, oled kuti kodimaha tulnu, – sanub Nina Zaiceva
Nina Zaiceva toivob, miše uz’ kändmine abutab vepsläižile kaita vepsän kel’t, kut abuti suomalaižile loda čomad i bohatad kirjkel’t, mitte om tetab mirus.
Kändmižen process jo mäneb. Tö voit lugeda ”Lemminkäinen i tegopedr”-palad Kalevalan 13. runospäi Kodima-lehtesen uhokun nomeras.
