“Kalarand” karguil da pajoil küksi pil’vid
“Kalarand”-praznik Kalages udes kerazi Änižen randal lujas äi rahvast. Huba sä ei telustand praznikale, rahvaz iloitelihe, hüvin mäneti aigad. Praznikan augotišes ozateldihe kaks’ kanzad čoman päivmäranke: ühtele kanzale täudui 50 vot, toižele — 55. Mugažo anttihe kitändkirjeižid aktivižile külän eläjile.
— Minä kaikuččen voden tulen praznikale. Se om lujas čoma, muga äi rahvast om! Vastsin äi tutabid, pagižin, lujas vessel om. Tämbei minunke praznikale tuli minun mužik-ki, meid ozateldihe, anttihe medal’. Meiden kanzal om sur’ praznik — eläm kožmuses 50 vot, spasib, miše mušttas neciš, sanui Kalagen eläi Valentina Ščervakova.
Praznikan aigan eziniba erazvuiččed pajo- da kargkollektivad: “Vepsän ranhvahan hor”, “Randaine”, “Pihläine”, “Karjala”, “Oma pajo”, “Pitarici”, “Vol’nije prostori”. Rahvaz surel tahtol ühtniba karguihe da horovodoihe.
— Praznik om lujas hivä. Kaikuččen voden “Kalarandas” om hivä i čoma praznik. Lujas om äi rahvast, artistoid, programm om lujas melentartuine. Radab jarmark, kus mödaze, mida sina tahtiid, kaiken voib ostta täs. Mina tulin tütrenke da vonukiidenke. Hengel om lujas hivä, sani praznikan adib Ol’ga Kokorina.
Oli äi erazvuiččid mastar’-klassoid: ned oliba melentartušt lapsile i aigvoččile. Kaikutte läksi praznikalpäi lahjanke, ken-se tegi ičeleze sumkan vai heboižen, toine — pr’anikan vai tätuižen. Rahvaz iloitelihe, kargaiži, vändiba erazvuiččihe vändoihe, söiba vepsläšt lent da kalitoid — praznik jäb äjiden muštho.
Tarkištele "Oma Median" MAX-kanalad!
