Kül’mkun “Kodima”: vepsläine elo kehub
Om pästtud eloho “Kodima”-lehtesen kül’mkun nomer. Sügüzen lop om tehnus ani bohataks erazvuiččil azjtegoil. Kalages kahesanden kerdan mäni “Vepsläine sarn” -festival’, a Vidlas — “Vepsläižed lapsed” -regionoidenkeskeine konkurs. “Pened Pimenovan lugendad” -kodirandan istorijan konferencijal vastsihe nored oppijad Šokšuspäi, Kalagespäi, Šoutjärvespäi, Ladvaspäi, Ladva-Vetkaspäi da Därvenojaspäi, miše starinoita ičeze školiden da küliden istorijas, tetabiš i melentartuižiš ristituiš. Karjalan Rahvahiden sebruden kodiš mäni mušteht, mitte oli omištadud 95-voččele jubilejale Rürik Petrovič Loninan sündundaspäi, a Šoutjärven vepsläižes etnografižes muzejas mäni “Taidehen ö” -akcii, miččele kerazihe lujas äi rahvast.
Vereses nomeras voib lugeda kahtes tärktas jubilejas-ki. Venäman tedoakademijan Karjalan tedokeskusen Kelen, literaturan da istorijan institut praznuiči ičeze 95-voččen jubilejan. Vidlan openduzkeskuz om eskai vanhemb — sille om täudnu sada vot! Udes lehtesen nomeras om sur’ da čoma Gul’a Polivanovan kirjutez Vidlan školan istorijas da jubilejale omištadud praznikkoncertas.
Hüväd uzištod varastaba vepsän man ortodoksižid eläjid: Vehkojas udištadas Hristosan sündundan pühäkodi, a Karhil-küläs zavottihe uz’ etap läz muretud Georgii Pobedonoscan pühäkodin kaičendas.
— Pimedas kül’mkus ristituile om ani tärged lugeda miš-ni hüväs da melentartuižes, rižada kehujad elod. Ihastun sihe, miše uz’ nomer voib koheta lugijoiden mel’t, sikš ku siš om festivalid, jubilejad, konferencijad, akcijad da toižed hüväd uzištod, sanui “Oma Media” -portalale “Kodima”-lehtesen toimitai Galina Baburova.
“Kodiman” toimišt ei unohtand literaturan navedijoiš-ki. Kül’mkun nomeras voib lugeda Oleg Mošnikovan uded runod, miččil om filosofižid meletusid sügüzes da elos. Sen ližaks neche nomeraha om pandud Svetlana Jeršovan kirjutez Kurban polhe, se oli oigetud “Minun külä” -konkursale da putui vägestajiden lugetišhe. Lehtesen radnikad oma ihastusiš antta ičeze lugijoile voimusen tundištadas mugoižen čoman tekstanke.
Johtutam, miše “Kodima”-lehtest voib otta “Periodika”-painištos ilma maksuta.
Tarkištele "Oma Median" Telegram-kanalad!
