Jyškyjärvi: Šuuri pruasniekka keräsi vierahie koko Karjalašta
Perintehellini kešäpruasniekka piettih Jyškyjärveššä heinäkuun 27. päivänä.
Pruasniekašša oli kakši ošua: enšimmäini oli kylän stadionilla ta toini Čirkka-Kemin joven rannalla. Huomenešpäivällä koko kylöveh ta kylän vierahat keräyvyttih stadionilla, missä oli käsityömuasterien luajokšien ta paikallisien tavarojen jarmankka. Kylälavalla esiinnyttih laulu- ta tanšširyhmät Jyškyjärveštä, Koštamukšešta, Kalevalašta šekä kučuttu vieraš Oma Pajo -kuoro.
Kun lavalla laulettih ta šoitettih vierahat šuatih ošallistuo muasteri-oppiloih. Karjalaisen kulttuurin Viena-šeura piti kieli- ta kasityötuntija.
— Jyškyjärven pruasniekašša aina on mukava ilmapiiri, kun ihmiset eri kylistä ta eri paikoista tullah ta näkeyvytäh vanhojen tuttavien kera. Viena-šeuran kera mie vietän karjalan kielen šanapelijä ta ihmiset tullah ta tarkissetah, kuin hyvin hyö maltetah kieltä, šano yksi pruasniekan järještäjistä Maikki Urbanovič.
Pruasniekan toini oša oli joven rannalla, riippujan šillan viereššä. Rannalla vierahie tervehittih lämpimäšti šepäyvymällä. Tänä vuotena Čirkka-Kemillä oli perintehellini kilpailu Jyškyjärven venehillä šekä SUP-lauvoilla.
Venehkilpailuh ošallistu nellä parie ta voittajakši piäštih jyškyjärviläiset Oleg Lazarev ta Anita Kolmačova.
— Mie opaššun nyt opissošša Petroskoissa, ka joka kešä vietän kotikyläššä. Myö tuaton kera käymmä kalalla rikeneh ta šielä hiän ni opašti milma šoutamah oikein, šano Oleg.
SUP-lautailu nyt on šuosittu urheilulaji. Toini kilpailu oli niillä ta naisien kešen voittajakši piäsi Julija Miškina ta miehien kešen Anton Šelin.
Kaikki ošallistujat šuatih muistolahjat, a kaččojat mukavie elämykšie ainutluatusešta kaunehešta tapahtumašta.
