Jubilejaks: Rad hänel om ezmäižel sijal
Tulijal vodel Petroskoin Suomalaiž-ugrilaižele školale täudub 30 vot. Läz 25 vot sidä ohjandab Natalja Valerjevna Barkalova, kudambale tämbei täudub 55 vot.
— Konz minai küzudas, äjak minai om lapsid, minä andan vastusen: “Enamba 900”. Minei kalliž om kaikutte openik. Kaiken aigan olen vaumiž tulda kaikuččele abuhu, sikš ku rad minai om ezmäižel sijal, sanub Natalja Valerjevna.
Barkalova zavodi rata školas №18 völ edel sen ühtenzoitust vodel 1999 Suomalaiž-ugrilaižen školanke. Ezmäi hän oli školas anglian da francian keliden opendajan, a sid’, loptes opendust Moskvan valdkundan universitetan psihologijan erištos, školan pämehen.
Lämäl sanal Natalja Barkalova johtutab sidä aigad da ristituid, kudambidenke ühtes hö todenzoitiba idejad Suomalaiž-ugrilaižen šklolan tegemižes eloho.
— Ei sa kadotada meiden školan etnokul’turišt jüväd. Meil mäneba kodikeliden urokad, nece ei ole ližaopenduz. I siš om sur’ ero. Karjalan, suomen da vepsän kel’, kut predmet — nece om kelen korktuz’. Meiden opendajad oma vastusenpidäjad siš, miše keliden tedo oliži standartan mödhe, mittušt pakičeb valdkund, ližadab hän.
Iče Natalja Barkalova om sündunu Kemiš, no hänel om vepsläižid jurid. Hänen mam om sündunu Podporožjen agjan Svir’stroi-küläs. Nügüd’-ki sigä eläba Nataljan heimolaižed: tädid, da däd’ad. Hän paksus oleskeleb ičeze kodimal heimolaižidenno.
Tärktemba lugekat ”Kodima”-lehteses №9 (20.09.2023) vai tägä.
