Louhen piirin Kiestinkin kylän eläjät vaštauvuttih perintehellisissa kotišeutupakinoissa. Šen järješti kirjašton ruataja Marina Aleksandrovna Pävina. Kučuttuna vierahana ta pakinojen pitäjänä oli Polina Sergejevna Voronina. Polina on istorikko, Petroskoin yliopiston spesialisti, ka on šyntysin Kiestinkistä ta konša hiän viettäy lomua kotikyläššä hänet kučutah kirjaštoh kertomah piirin istorijašta.
‒ Polina Sergejevna kerto Louhen piirin hallintojavošta, mit kylät mih volostih tahi kuntah kuuluttih. Mitein ne oli muovoššuttu ta konša niijen nimet muututtih. Še on mukava teema niillä, ket harraššetah kotišeutututkimušta tahi šukututkimušta, šano toimenpivon järještäjä, Kiestinkin kirjaštonruataja Marina Pävina.
Iče Marina Aleksandrovna kerto keräytynyillä Kiestinkin kyläkunnan paikojen nimilöistä, kirjašton kotišeutufondista ta šiitä šuavuista tiijoista.
‒ Kirjašton kotišeutufondi peruššettih entini kirjaštonruataja Galina Nikolajevna Šeina ta entini muatietoopaštaja Svetlana Andrejevna Jungina. Mie löysin šiitä ihmisien muisselmie, kumpasie ei ole enyä elošša. Monet muisselmat košetah aikua ennein šotua, niissä on kertomukšie elokšešta, perintehistä, šyömisistä. Vaštautumisen aikana oli mukava lukie muisselmien pätkie, lisäsi Marina Aleksandrovna.
Kotišeutupakinat tultih perintehellisekši pivokši. Niijen aikana kiestinkiläisillä oli jo kerrottu kotišeuvun paikkojen ta ihmisien kohtaloista, karjalaisien pakolaisien istorijašta.