Etnokulttuurisen kehitykšen kilpailun voittaja šuau kolme miljonie rupl’ua tiijotuštaulujen ašettamiseh karjalan ta venäjän kielellä, karjalan kielen kurššien järještämiseh lapšilla ta aikuhisilla, kanšallispruasniekkojen pitämiseh, Runoranta-etnokulttuurikokomukšen kunnoštamiseh šekä perintehellisen talouven elvyttämiseh ta kannattamiseh.
– Perintö on kaikkie varoin -projekti starttasi jo viime vuotena. Šilloin oli kunnoššettu Runoranta-paikka, mi on Lönnrotin männyn viereššä. Tänä vuotena rannan kunnoštamini jatkuu, šinne ašetetah uušie art-kohtehie. Kalevalašša ta Jyškyjärveššä pietäh karjalan kielen kurššija. Vielä myö oššamma uušie varuštehie Kalevalan, Jyškyjärven, Luušalmen ta Vuonnisen kanšallisien pruasniekkojen viettämistä varoin. Niise alotamma perintehellisien ruatojen, esimerkiksi verkkojen kutomisen, opaššušta, šelitti Kalevalan piirin piämiehen šijahini Julija Kononova.
Etnokulttuurisen kehitykšen kilpailuh oli työnnetty 11 projektie Kemin, Louhen, Mujejärven, Onegarannan, Puudožin, Segežan, Šuojärven, Kalevalan, Aunukšen ta Priäžän piirilöistä šekä Koštamukšen kaupunkipiiristä.
Kilpailun järještäjänä oni Karjalan tašavallan alovehellisen ta kanšallisen politiikan ministerijö.