Anukseh kerävyttih sovukkahat perehet
Anuksenlinnas Muaman päiviä vaste piettih Pereh 2025 -kilbu. Karjalan eri kolkispäi tulluot perehet ozutettih omua histouriedu da suavutuksii. Solnečnii-keskukseh kerdyi kilbuniekkua Anukses, Petroskois, Lahdenpohjas, Priäžäs, Lahkolammis, Uvves Vilgas da Salmispäi. Jogahine pereh löyhki omua elostu, ozutti perehsuhtehii da lapsien akkiloiččemistu.
Kilvas perehet ozutettih omii neroloi da perehsobuu ”Perehpastostu” valmistajes da ”Tuttavuskortii” luadijes, pyörittih aivoloi intellektukilvas ”Tunnettogo toine tostu” da pajatettih yhtes ”Perehkaraoke”. Paiči arvostusjoukkuo perehien neroloi arvostettihgi kilvan kaččojat.
— Meijän perehes on seiččei lastu, kaksi tyttö da viizi brihaččuu. Myö kai ruavot ruammo yhtes — rakendammo, valmistammo syömizii, matkustelemmo. Tänä vuon lapset kyzyttih ostua heile haudomo. Toinah oli hyviä mieldy, konzu se ”haudoi” heile kananpoigazet, kerdoi Oma Mediale omis lapsis Uvves Vilgas eläi lapsekas muamo Marina Sokolova.
Kilvas enzimäzen sijan suadih anukselazet Popovat, toizele sijale piäzi Rubannikovien pereh Petroskoispäi, kolmandele sijale nostih Anukses eläjät Leontjevat. Kaččojien mieles parahinnu oldih Lahkolammin eläjät Šuleikot.
Pidoh yhtyttih Valdivon Duuman deputuattu Valentina Pivnenko, Karjalan sotsiopuolistuksen ministru Ol’ga Sokolova, Zakonoinhyväksyndykerähmön deputuatat Tatjana Tiškova da Jurii Vasiljev, Anuksen piirin piälikkö Vadim Murii.
Pivon lopus kaikis yhtes viettih karjalastu kruugua da juodih čuajuu.
Pereh 2025-kilbu kuului Territorija doverija -projektah da oli sen jälgimäzenny tapahtumannu.
Yhty Oman Median kanualah Telegramas!
