Šanelu on kirjutettu keškikentällä
Jokavuotini Karjalan ta vepšän kielen šanelu -aktijo starttasi tänäpiänä, Karjalan ta vepšän kirjakielen päivänä. Aktijon järještäjänä on Karjalan tašavallan kanšallisen ta alovehellisen politiikan ministerijö. Šanelun ošanottajien miärä kašvau vuosi vuuvvelta.
– Tänäpiänä Petroskoin valtijonyliopistoh tuli noin 80 ihmistä. Hyö kirjutettih šaneluo karjalan kielen livvin, lyydin ta vienan murtehilla šekä vepšän kielellä. Kaikkieštah šaneluo ruvetah kirjuttamah 75 kentällä Karjalan tašavallašša šekä Tverin, Novgorodin, Leningradin ta Vologdan alovehella, kerto aktijon järještäjä, Karjalan kanšallisen ta alovehellisen politiikan ministrerijön spesialisti Aleksandra Anufrijeva.
Šanelun avajaisissa ošanottajie tervehittih Kanšallisen ta alovehellisen politiikan ministeri, Petroskoin yliopiston vararehtori, filologijan instituutin johtaja šekä Karjalan Rahvahan Liiton ta Vepšäläisien kulttuurišeuran etuštajat.
Šamoin oli myönnetty lahjoja parahista vaštaukšista kyšymykšeh: “Mintäh kirjutat šaneluo?”
Tänä vuotena kirjutettavakši oli tarittu Valentina Osejevan kertomuš “Pojat”. Tulokšet šuau tiijuštua šulakuun 26. päivän jälkeh šanelun VK-ryhmäštä. Aktijo pietäh yheššä Karjalan Rahvahan Liiton ta Vepšäläisien kulttuurišeuran šekä Petroskoin valtijonyliopiston ta Karjalan TV- ta ratijoyhtijön kera.
